PUCUK DICINTA ULAR PUN TIBA
oleh : Oesman Doank
oleh : Oesman Doank
MARYATI emang demen banget sama nyang namanye kentang goreng. Sehari aje die nggak makan kentang goreng, kayaknye ada yang kurang. Kadang, nyokapnye empet. Sebab, kalo gak dibikinin kentang goreng, Maryati lebih mau cembetut timbang ngelepas senyum. Nyang dikuatirin nyokapnye, die takut kecakepan anaknye ilang. Soalnye, kalo udeh cembetut lantaran nggak makan kentang goreng, Maryati jadi males belajar.
Markum sama sekali kagak tau ape makanan kesukaan Maryati. Juga kagak pernah nyaho kalo kagak dibikini kentang goreng, suka pamerin cembetut.
Makanye, waktu pas Markum pulang dari kantor, die kaget seperempat pingsan. Soalnye, pas begitu die standarin motor, di beranda rumah ada Maryati nyang duduk sendirian. Biasanye, kalo nggak nyapa setelah disapa dengan salam, pasti ngelepas senyum. Tapi, kali ini, jangankan ngelepas senyum. Ucapan salamnye aje nggak ditanggepin
"Kenape tuh cewek," pikir Markum, nyang lantas ngelangkah dan pas langkahnye sampe di depan Maryati, die berhenti dua jenak (Kalau sejenak jadi nggak tau posisi persis raut muke Maryati)
Setelah merhatiin dengan seksama dan sesingkat singkatnye, Markum yakin kalo Maryati lagi nyetel roman muka kesel. Soalnye, bukan pamer senyum dan ngelaunching keceriaan, tapi lagi mejeng kesel
Buktinye, gitu, deh. Gimane sih kalo lagi cembetut.
"Baru ditinggalin sama pacar, yaa?" Sapa Markum
Tentu aje sapaannye tulus dan di dalem sapaannye nggak mengandung niat apapun, kecuali negor karena Markum paling nggak mau kalo dirinye dibilang sombong
"Ngapain sih pake negor negor !" Sahut Maryati
Busyet deh ! Siape nyang kagak kaget kalo negor bae bae malah disahutin dengan kalimat kayak begitu Terlebih, ekpresi Maryati emang kagak pamerin rasa persahabatan.
Cuma, Markum sama sekali nggak kesel. Buktinye, seudeh kagetnye ilang, sambil tetep senyum Markum cuma bilang ," Waduuuh maaf... kirain lagi nggak mau ditegur. Nggak taunya kamu lagi malas disapa, ya. Oke. Selamat nggak mau ditegur yaa"
Brengseknye, menurut Markum, kok pas malemnye doski malah kagak bisa tidur.
Mulanye, sih Markum inget sama Sutini ples ketiga anaknye. Tapi, semua sudah sirna setelah Markum ngebel bokinnye. Dan sebagai penghilang rindu, Markum gak cuma nyapa semesra mesranya. Tapi, bincangnye juga sangat mesra. Malah, sempet nyerempet nyerempet ke hal hal yang biasa Markum dan Sutini budayain, tiap kali mereka ada di kamar beduaan.
Untung aje, baru malem Kamis. Coba kalo suasana kayak gitu terjadi besok malem alias di malam Jumat. Mungkin, Markum udeh kepengen ngacir ke rumah pribadinye. Setelah ngelongok anak anaknye, pasti leluasa ngelongok Sutini, nyang pasti juga rindu kepengen dilongok.
Cuma, kenape sekelarnye ngelepas rindu ke anak bini nyang ada nun jauh disane, ngedadak Markum nggak bisa bobo. Padahal, biasanye gampang merem. Sialnye, saat nggak bisa meremin mata, nyang terus muncul di pelupuk mata Markum bukan anak isteri. Tapi, Maryati.
Yaa... Maryati, yang lagi cembetut habis. Bener bener jadi kayak flashback.
Soalnye, muncul lagi dan muncul lagi.
Meski udeh melok guling sekenceng kencengnye, tetep aje Markum susah tidur
Meski udeh bolak balik posisi tidur, tetap aja susah bobo. Buktinye, pas posisi bantal dirobah ke Selatan, nyang nongol Maryati nyang lagi cembetut. Padahal, nyang dikepengenin Markum bukan itu. Tapi bobo, dan saat lelap bisa mimpi maen sama ketiga anak anaknye di halaman rumah.
Begitu juga sebaliknye. Meski posisi bantal udeh dipindah ke utara, ke tenggara, tetep aje sulit bobo
"Busyet, deh... apa yang sedang terjadi pada diriku. Kenapa wajah cembetut itu kok lebih cantik dari wajah aslinye yang tidak cembetut memang cantik, " begitu kate Markum di dalem ati
Di kamarnye, Maryati juga nggak bisa sleeping.
Kayaknye, Maryati keseeeeeeeeeeeeeeeel banget. Keselnye, bukan lagi lantaran kentang goreng.
Di saat ini, Maryati kesel lantaran die nyesel kenape bisa bisanye die bersikap sombong lantaran lagi kesel sama enyaknye nyang lupa bikinin kentang goreng
Padahal, Markum sama sekali nggak salah dan sangat tidak layak dijadikan sebagai calon orang yang layak disalahkan. Terlebih, dia nggak tau apa apa dan sama sekali nggak terlebat dalam proses lahirnye kekesalan Maryati.
"Die tuh begitu sopan. Negor lantaran die punya etika. Kenapa gue malah ngejawab seenak bero gue. Duuuuuh.. die tersinggung ape nggak yeee?" Maryati yang super gelisah membatin.
Lantas, mau nggak yee Maryati minta maaf atas ulahnye nyang gara gara kentang goreng, die malah ngobral empet sama Markum nyang negor dengan sesopan sopannnye?
Bersambung.............
0 komentar:
Posting Komentar