DIMINTA JADI PEJABAT
oleh: Oesman Doank
Kelar ngebaca surat nyang dikirim oleh Panitia Pemilihan RW, Mat Bodong kagak nampilin reaksi senang atawa gedek. Ditaruh aje tuh surat di atas meja. Seudehnye dia ngelangkah ke beranda rumah. Duduk di kursi sembari nikmatin hembusan angin senja nyang semilirnye bikin adem, sejuk, ngenakin ke badan.
"Di atas meja surat dari mane, bang" Tanya bokinnye sembari naruh gelas kopi di meja.
"Biasa... dari panitia pemilihan RW," sahut Mat Bodong nyang nafsunye langsung muncul begitu ngeliat kopi item kesukaannye masih ngebul.
"Siape aje nyang kali ini nyalonin mau jadi RW." bokinnye nambah pertanyaan.
"Mana gue, tau. Kan baru aje pemberitauan. Calonnye, siape aje boleh ngedaftar. Nyang penting siap jadi RW," kate Mat Bodong sambil ngeraih gelas, dan dengan mantap tuh kopi nyang masih panas ditiup tiup lantas dengan semangat diseruput.
"Kayaknye abang kagak beminat jadi RW, deh," kata bininye.
Die sengaja bilang begitu, lantaran nyaho, kalo ditanya "emangnye abang kagak beminat jadi RW," paling paling Mat Bodong nyautin,"Ngapain gue mesti jadi RW. Gue kan nyadar, kagak bakalan mampu perhatiin kepentingan warga. Lagian, gue ngeri, kalo nggak bisa ngelaksanain amanah, jatuhnya jadi dosa. Ribet gue kalo nanti diminta tanggung jawab di alam kubur"
Lantaran kata kata bokinnye bukan pertanyaan tapi kesimpulan, kelar ngabisin separo kopi di gelas, Mat Bodong ngejawab enteng
"Tau aje lu gue kagak bakal mau nyalonin jadi RW"
Sang Bokin bukan kagak gerah ngedenger penjelasan singkat lakinye. Cuman, lantaran tau siape Mat Bodong, die kagak mau memperpanjang lagi soal mau ape kagak lakinye nyalonin diri jadi RW.
Cuman, Bokinnye jadi penuh harap. Soalnye, baru aje die mau masuk ke dalam rumah, dateng tamu nyang bukan orang asing. Tapi orang nyang dikenal banget. Namanye Kong Jiun. Biasanye, begitu dateng die minta kopi. Kali ini, malah langsung minta - malah ngewanti wanti, supaya Mat Bodong ngedaftar buat jadi calon ketua RW
"Soalnye,"kate ngkong Jiun, " Selepas gue pensiunin diri jadi RW, udeh tiga orang nyang gantiin gue, nggak ada nyang punya prestasi ape ape"
"Laaaah," sahut Mat Bodong santai
"Emangnye aye bisa bikin prestasi ape, kong?"
"Lu pasti bisa, Mat. Kan kalo soal ide, bisa tanya atawa konsultasi sama gue. Nyang penting, lu jadi RW dulu. Nanti, gue dukung full. Jadi, lu bisa realisasiin soal kepedulian sosial, nanggulangin banjir. Pokoknye, lu pasti bisa ngejalanin tugas kayak gue waktu jadi RW. Nyang kagak pake pamrih, tapi pake pengabdian nyang ikhlas demi kepentingan warga"
Mat Bodong malah bingung.
"Nggak usah bingung, bang," samber bokinnye, sembari nambahin
"Nyang dibilang engkong tuh, bener banget. Kalo abang nyalonin, pasti dipilih. Sebab, orang pada tau, kalo abang cucunye Kong Jiun, nyang pernah jadi RW paling berprestasi. Paling disegenin, lantaran kepedulian sosialnye tinggi"
Mat Bodong jadi tambah bingung.
Kenape Mat Bodong bingung ? Ikuti aje lanjutannye
Bersambung.........
0 komentar:
Posting Komentar