DIMINTA JADI PEJABAT
oleh : Oesman Doank
GIMANE Mat Bodong kagak bingung?
Pertame, jangan kate punya cite cite jadi pejabat, ngimpiinnye aje, ogah. Soalnye, di zaman nyang udeh makinan geblek, mau jadi pejabat kudu mau keluar banyak doku. Kalo males atawa segen ngeluarin doku, sulitnye bukan cuman bukan maen. Tapi, juga nggak bakalan ada solusi. Sebab, solusinye cuman satu, kudu pake biaya. Kalo boleh pake daun jambu sih, no problem. Kalo pake doku asli?
Wow, mendingan buat modal usahe.
Pasalnye, siape sih orangnye nyang lantaran udeh ke luar doku banyak, pas jadi pejabat kagak mikirin gimane caranye balik modal. Padahal, gaji nggak seberape, Nah, nggak mungkin biaya buat jadi pejabat nyang selangit, bisa balik kalo cuman ngandelin gaji. Jadi, mau nggak mau, ngelakonin nyang salah jadi bener, atawa sebaliknye.
Kalo udeh begitu, ujung ujungnye pasti berurusan sama Komisi pemberantasan Korupsi.
Kedua, kan selama ini nggak pernah jadi pejabat. Jadi, gimane bisa ngurus rakyat kalo pengalaman aje belon punya. Lagian, kan aneh, kalo cuma mau sok ngurus rakyat, sementara ngurus keluarga aje ngos ngosan. Pokoknye, Mat Bodong yakin, die nyang belon mampu membangun keharmonisan rumah tangga, kagak bakalan mampu membangun keharmonisan masyarakat, nyang karakternye beragam.
Ketiga, Mat Bodong kagak mau diribetin aneka ragam masalah. Misalnye, kalo ada musibah banjir. Kayaknye, dia belon bisa nolongin rakyat nyang kebanjiran, sementara di rumahnye juga banjir. Kayaknye, nggak mungkin kalo rumahnye sendiri kebanjira, die mesti ngeduluin ngebantu warga yang kebanjiran. Mulai dari konsumsinye sampe ke kondisi kesehatannye.
Pokoknye, "Lebih bae gue tetep ogah jadi pejabat timbang kepengen jadi RW," begitu keputusan nyang akhirnya mesti diambil oleh Mat Bodong, nyang diem diem mengintropeksi dirinye
Mat Bodong yakin, nggak bakal mampu jadi pemimpin.
Jadi, siapa aje kagak boleh ada nyang maksa die kudu jadi pemimpin. Sebatas ngedukung, ngasih support, dan sebagainya, please please aje deh. Tapi, kalo maksa
Mat Bodong jadi pejabat, engkongnye sekalipun dia bakal jawab," Suruh aje deh orang laen yang jadi RW. Aye cuma mampu jadi warga biasa aje"
"Laki luh tuh bener bener ketermaluan, eh, maksud gue keterlaluan," kate engkong Jaim, nyang kesel lantaran kagak nyangka kalo cucunye malah nolak diangkat jadi pejabat.
"Yaaa.... gitu deh,Kong. Namenye juga laki aye. Kalo udeh kagak mau, nggak bakal bisa dipaksa, mesti disogok sama duit sekarung "
"Terus gimane dong kalo nyang nanti kepilih jadi RW, maunye cuma jabatan tapi kagak pernah mau ngurus warge," Keluh kong Jaim.
" Auuuu aah kong... mau bilang terang, tetep aje saye cuma bisa bilang gelap," kate bokin Mat Bodong nyang buru buru ke dapur lantaran ngendus ada masakan nyang gosong.
0 komentar:
Posting Komentar