CINTAKU JANGAN DIBELAH DUA
oleh : Oesman Doank
SEPULUH
Perkiraan Jali sama sekali kagak keliru.
Jali nggak cuma ngedenger dari bang Miun atawa encang Goplek. Soalnye, soal Rojak yang lagi uring uringan, kayak udeh nyebar ke semua orang kampung. Rata rata pada bilang, belakangan, Rojak sering uring uringan, sebab, pembeli tanah nyang siap bayar harga tanah nyang udeh disepakatin, baru siap ngelunasin kalo surat suratnye lengkap dan ada surat persetujuan dari ahli waris.
Cuma, JALI belagak kagak tau. Makanye, waktu die ketemu abangnye di warung kopi Mpok Mila, nyang menurut kabar bakalan disunting sama abangnye, Jali cuma ngajak ngobrol soal taneman nyang belakangan lumayan laris manis. Makanye, Jali kembali nyoba nawarin ke abangnye supaye mau ikutan buka usaha taneman hias.
Kalo aje abangnye beminat, kayaknye Jali kagak keberatan deh ngajak Rojak. Malah, Jali punya niat ngangkat abangnye jadi asisten. Nah, kalo abangnye mau serius dan tekun usahe di bidang taneman hias, Jali kepengen nyari lapak di tempat laen dan lapak nyang sekarang ada siap diserahin ke abangnye.
Sayangnye, sang abang bukan bersyukur malah kayak emosi. Malah dengan agak somse, Rojak bilang, kalo die punya rencana mau buka usaha rental mobil. Mentang mentang ngobrolnye di warung mpok Mila, die malah nyuruh JALI ninggalin bisnis taneman hias, lantaran bulan depan temennye ngedrop dana buat beli beberapa buah mobil dan kalo udeh start, die perlu asisten nyang siap nangkring di kantor.
" Kalo lo mau, " kate Rojak
"Gue kan jadi bisa ikutan bisnis impor sapi sama temen gue. Sebab, die tuh perlu asisten yang punya kemampuan ngelobi orang orang penting supaya aktivitas import sapinye tetep lancar "
Jali nyang tau persis abangnye cuma obral omongan, langsung nolak ajakan abangnye secara halus. Akhirnye, Jali pamitan tanpe kepengen ngebahas ajakan abangnye nyang sebenernye cuman obral gengsi. Sebab, Jali tau, nggak mungkin abangnye punya temen nyang pengusaha sukses. Kalo pun ada, gak bakalan ngasih kepercayaan ke Rojak buat ngelola usaha rental mobil
Bukan lantaran Rojak kagak pernah tamat Sekolah Lanjutan Tingkat Atas. Sebab, soal ngelola bisnis rental mobil, kalau punya modal nyang diperluin bukan ijazah. Tapi, kemauan, kemampuan dan kredebilitas. Padahal, abangnye nggak punya kemauan kerja keras dan kemampuan berbisnis. Kredibilitasnye juga kagak bisa dijadiin jaminan. Sebab, nyang sering die tonjolin cuman ngerongrong nyokap
Buktinye, tanah warisan khusus buat die aje udeh semuanye dilego. Hasilnye, jangan kate kebeli mobil. Motor aje kagak gablek. Maklum, selaen abis buat foya foya, juga bures dipake buat nambah bini. Ujung ujungnye, cuman bini tuanye nyang masih ikhlas bertahan. Dua bini mudanye, semua minggat begitu tahu doku abangnye udeh lebih tipis dari kulit bawang.
Eeeh, di depan Mpok Mila nyang kepengen die sunting, gampang banget omong gede.
"Kapan lu mau insaf sih, bang," keluh Jali nyang begitu sampe di lapak tanemannye, malah sempet mikirin ulah sang abang nyang umurnye udeh mau empat puluh lima, tapi prilakunye kayak anak muda nyang umurnye masih jigo.
Untungnye, Jali nyang sempet mikirin sang abang dan sempet ngerasa pusing, ngedenger suara yang ngucap selamat siang. Kalo kagak, boleh jadi masih pikirannye masih fokus ke abangnye nyang besok pasti lusa nemuin Jali nanyain soal surat tanah.
Cuman, begitu bebas dari mikirin sang abang, Jali nyang nengok ke arah suara, kagak bisa ngeles dri rasa kaget. Pasalnye, sosok nyang dateng ke lapaknye adalah sosok nyang sulit die lupain. Meski baru sekali ketemu, Jali gak bakal lupa sama wajah cantik nyang kalo waktu itu die kagak ngebom dengan suara braaat..breeet..brooot.... udeh pasti bakal ngerepotin.
" Mau ngapain die dateng ke lapak gue," Jali ngebatin sembari terpaksa menyambut kedatangan si cewek kece nyang waktu die nganterin antorium ke rumahnye, langsung nyosor kayak bebek mau betelor
Bersambung...........
0 komentar:
Posting Komentar