CINTAKU JANGAN DIBELAH DUA
Oleh : Oesman Doank
SEMBILAN
“Jali..Lu tuh emang udeh bisa megang
prinsip. Cuman, sebelon nasi jadi bubur, ada baenye kalo lu tegor, tuh, abang
lu. Bilang sama die, tuh tanah bagian, lu. Bagian abang lu, udeh dikasih. Malah
lebih luas. Cu man udeh die jual. Waktu dapet duit dari jual tanah, boro-boro
die inget ame lu, adenye, sama enyak aje, die cuwek. Sama sekali kagak peduli “
“Nyaak..bang Rojak tuh mau
seneng-seneng. Ka lo Jali tegor, dia pasti bakalan marah? Emangnye, e nyak
ngijinin, kalo die tersinggung, marah, terus Jali lawan, Jali bales gebuk “
“Yee, kalo bisa, sesame sodare jangan sampe gebuk-gebukan.. Cuman, kalo emang
kepaksa, enyak ngijinin, kok. Soalnye, kalo terus didiemin, lama-lama, nih
rumah nyang enyak tempatin, pasti diincer buat dijual sama abanglu “
Jali berusahe ngeyakinin enyaknye
supaye kagak kuatirin hal nyang baru diungkapin. Sebab, Jali yakin, bang Rojak
kagak bakalan senekad atawa segile nyang dikira enyaknye.
Cuma, sang enyak malah kagak yakin.
“Jali..Jaliii… Kite emang kagak boleh ngeduga
nyang kagak bagus. Terlebih, sama abang lu sendiri. Cuman, dari nyang udeh die
lakuin, naga naganye sih bakalan terjadi. Sebab, mangkin kesini, abang lu bukan
nye insaf, bukannye sadar, malahan makin aje gile. Ngerti ape kagak, sih lu?”
tegas sang enyak
Jali bukan kagak ngerti sama
kekuatiran enyaknye. Cuman, secara pribadi Jali tetep yakin, kalo Rojak,
abangnye, nggak bakalan berani betindak gegabah. Sebab, segile gilenye Rojak,
nggak mungkin tega ngegasak rumah nyang sekarang jadi tempat tinggal enyak
mereka.
Kalo soal tanah bagian Jali nyang
kepengen dijual abangnye, Jali sih ikhlas ikhlas aje. Cuman, gimane abangnye
bisa ngejual tuh tanah, kalo suratnye ada di Jali. Emang, abangnye belon tau
kalo Jali udeh urus sertifikat atas nama die.
Semisal tanahnye nyang udeh
disertifikatin bisa dilego abangnye, menurut Jali, nyang gila bukan Cuma bang
Rojak. Pembelinye juga edan. Masa’ sih mau beli tanah tanpa sertifikat atau
bukti kepemilikan dari si penjual.
Meski begitu, Jali juga belon kepengen
kasih informasi ke enyaknye. Soalnye, kalo Jali bilang tanahnye udeh dibikinin sertifikat atas nama JALI, nanti nyokapnye malah manfaatin dan bilang ke Rojak - sang abang, die kagak bakalan bisa ngelego seenak jidat. Sebaliknye, abangnye - kalo lagi dapet kesulitan dan butuh duit, bisa aje die ngedesek nyokapnye supaya ngebujuk Jali minjemin tuh sertifikat. Soalnye, sekesel keselnye sang enyak sama abangnye, Rojak paling bokis dalem hal ngebujuk enyak, Kan gak kocak, kalo sekarang enyaknye nyap nyap, besok besok malah ngebela kepentingan Rojak. Yaa... namanye juga enyak sama anak. .
Kalo udeh gitu, Jali tentu kagak
bakalan tega. Terlebih, kalo gagal ngebujuk Rojak nggak segen maksa sang enyak. Kalo udeh begitu, enyaknye nyang takut banget sama Bang Rojak, bakalan ikhlasin rumah nyang sekarang ditinggalin sama enyak, dijual sama bang Rojak. Tapi, kalo
emang tindakan abangnye sampe ke sane, kayaknye Jali nggak bakalan tinggal diem.
Cuman, kan kekuatiran enyaknye belon
jadi bukti
Mangkanye Jali tetep ngeyakinin
enyaknye hal entu kagak bakalan terjadi. Lantas, kenape Jali malah bilang
begitu? Nggak laen supaye enyaknye kagak terlalu kuatir.
Kan repot kalau enyak tersayangnye cuman di bayang
bayangin kekuatiran. Nah, timbang terus menerus mikirin nyang belum terjadi
lantas enyaknye malah stress, kan lebih baik nenangin pikiran sang enyak,
supaya kagak stress.
“Lu paham ape nggak sih nyang enyak
bilang?” Tanya sang Enyak, nyang keliatan masing aje kuatir lantaran Jali keliatan
malah kagak ngedukung pendapet sang enyak.
“Nyaak… pokoknye, enyak kagak perlu
kuatir. Jali rela, kok, semisal tanah bagian aye dijual sama bang Rojak. Cuman,
kan nantinye mesti bilang dulu ke Jali. Naaah, semisal hal entu terjadi, pas
bang Rojak minta persetujuan Jali, baru ada alesan buat Jali ambil tindakan.
Sekarang sih, enyak nggak usah was was. Kan belon kejadian. Jadi, sebaenye
enyak gak usah mikirin, Oke?”
Sang enyak kagak nyahut. Cuman, dari
manggut manggutnye, die keliatan mulai tenang.
0 komentar:
Posting Komentar