CINTAKU JANGAN DIBELAH DUA
Oleh : Oesman Doank
TIGA
Untung, dua kali die bilang begitu,
sopir angkot nyang sok jagoan, kagak ngelawan. Kalo waktu entu ngelawan, Jali
yakin, nyang lantas Jali perbuat bukan ngehajar, tapi langsung masukin golok ke
sarungnye sembari buru buru ke motornye.
Pas sampe di motor langsung minggat. Jali bukan kagak mau tarung
sama tuh sopir angkot. Tapi cuman kagak mau bekelai. Jadi, nggak mungkin Jali
ikhlas ngebacokin goloknye. Sebab, buat ape die rajin shalat. Buat ape belajar
ngedalemin agame kalo ujung ujungnye malah ngehajar orang.
. Nyang dilakuin Jali, sebates ngebangun
moral di jalan raye, supaye nyang biasa ugal ugalan pada tertib. Kalo nyang
dilakuin Jali ada nyang nilai salah, Jali kagak bakalan marah.Soalnye, tuh
golok nyang dibawa setiap hari bukan buat ngebacok orang. Tapi, buat motong
motong batang atawa daun dari setiap pohon hias
Tapi,
kalo soal belok ngebelok, Jali pasti bener. Soalnye, tiap mau belok, pasti
tetep ngasih tanda, Lampu sen motornye pasti kedap-kedip. Sebab, Jali udeh
biasain diri buat ngasih isyarat supaye
nyang ada di belakang motornye, kagak kagok waktu die belok ke kiri atawa nikung ke kanan.
Sayangnye pas sampe ke alamat
yang dituju, Jali kagak bisa cepet-cepet nurunin kembang dari motornye.
Soalnye, hpnye masih aje bunyi. Jali kepakse ngelayanin panggilan enyaknye.
Belon lagi sempet bilang
Assalammualaikum, Jali udeh ngedenger suara enyaknye, nyang tentu aje bukan mau
ngasih doku, tapi ngasih atawa ngirim omelan. .
“ Muke gile, lu. Dihubungin orangtua,
bukan cepet cepet nyautin. malah ngediemin. Lu udeh kagak mau nganggep gue
enyak ?”
Jali kepingin banget ngejelasin. Tapi,
baru mau ngomong udeh langsung diduluin lagi ame enyaknye nyang terus nyerocos..
“ Pokoknye, kalau lu kagak cepet-cepet
dateng ke rumah,kapan aje lu mau ketemu enyak, kagak bakalan sudi gue ngebukain
pintu “
Kelar ngomong, enyaknye nyang emosi berat
langsung nutup hpnye. Jali kayak kagak percaya ama kenyataan nyang baru aje
dialamin .
“ Hallo…halloo …”
Percuma, Jali nyebut sejuta kali kata
hallo. Sebab, Mpok Rodiyah, nyang pastinye lagi sewot, udeh gak bisa lagi
dihubungin. Jali bukan kagak bingung. Cuman, lantaran sadar lagi nyari nafkah,
die buru-buru mendem masalah. Jali nyang udeh nyampe di depan pintu pager rumah
mewah, ngelongok ke dalam sana .
Ngeliat kagak ada mahluk barang sepotong, Jali kepaksa mencet bel.
Jali narik nafas lega, lantaran kagak
lama, dari dalam rumah mewah ada juga nyang nongol. Jali yakin, nyang lagi
ngelangkah ke pintu pager mau ngebukain supaye die bisa masuk, bukan pembantu.
Emang bener. Cuman, perempuan muda nyang cakep, seksi kagak langsung ngebukain
pintu. Ia malah keliatan curiga.
“ Pak David suruh saya antar anthorium ?”
Jali kepaksa buru buru ambil inisiatif buat ngejelasin
Begitu ngedenger nama pak David disebut,
perempuan sekitar duapuluh lima tahunan, dengan pakaian aduhai, nyang pasti
nyonya rumah, baru ngebukain pintu. Jali buru-buru ngedorong motornya ke dalam.
Baru nurunin pot isi antorium nyang ditutup rapi ame kertas koran.
“ Kenapa harus ditutup koran ?” Tanya nyonye
rumah, nyang kayaknye kepengen.
Mudah mudahan sih kepengen taunye cuman
kepengen tau doang, kagak merembet ke
pengen tau banget. Mudah mudahan juga kagak kepengen ngajak ngobrol
Cuman, si nyonye rumah nyang
ehem ehem cakepnye, juga nyempetin diri buat nanya kenape kembang nyang dibawa Jali pake motor, pake dibungkus
rapi meski bungkusannye cuman koran dan bukan karpet.
Bersambung……
0 komentar:
Posting Komentar