CINTAKU JANGAN DIBELAH DUA
Oleh : Oesman Doank
EMPAT
“ Supaye daunnye kagak rusak dicolek angin” Jali cepet-cepet ngejelasin. Cuman,
matanye kagak berani ngeliat langsung ke tubuh moleg nyang diakui oleh Jali
sejujurnye – meski cuman dalam hati, sangat ngundang selera.
Jali bukan kagak mau manfaatin
kesempetan. Cuman, Jali takut imannye malah
jadi blingsatan. Meski begitu, batinnya bilang.
“ Gile banget dah tuh orang. Gue kirain bininye udeh seumuran ama die.
Kagak taunye ? Gue yakin die cuman bini piaraan “
Jali nyang sambil ngebatin ngerogoh bon di
kantong baju, tetep kagak berani ngangkat muka. Sambil tetep nunduk, Jali nyodorin
tanda bukti pembelian ke bininye pak David..
“ Ini bukti pembeliannya bu “
Nyang punya rumah ngambil bon pembelian dari tangan Jali. Ngeliat Jali yang seabis
nuruin kembang kagak pernah angkat muka, die ngelepas senyum aduhainya. Jali
patut bersyukur lantaran kagak ngeliat senyum nyang baru aje ngembang begitu
indah dari bibir mungil. Kalo ngeliat, pasti langsung blingsatan. Dadanye
deg-degan, batinnye pasti langsung ngobarin perang.
Tentu aje bukan perang ngelawan tentara Israel ,
nyang tindakannye ngegedegin lantaran kagak abis-abisnye ngebantai orang orang
Palestina. Tapi, perang ngelawan desiran hawa nafsu. Hawa nyang kalo udeh
blingsatan, bisa langsung lupa ama ape aje. Sebab, nyang namanye gejolak hawa
nafsu sanggup negerubuhin iman siape aje nyang tingkatannye masih belon masuk
ke level kelas tinggi.
Tapi,hasilnye udeh bisa dipastiin. Jali pasti
bakalan nongol jadi pemenang. Sebab, statusnye kan cuman tukang kembang
Jadi,meski bisa aje dia kagak mampu ngendaliin gelora hawa nafsu, nyang punya
rumah, belum tentu sedia ngelayanin.
Emang, Jali masih muda, gagah dan umurnye baru
tigapuluh taon. Cuman ape sih hebatnya kalo status Jali sebates tukang kembang
doang. Jadi, gak mungkin nyang punya rumah bisa kepincut atawa kegoda.
Jadi, meski baru aje ngelepas senyum aduhai nyang ehem
ehem, senyum nyang bisa atawa boleh aje ditafsir macem-macem, Jali kagak ambil
pusing. Cuman, meski bisa ditafsir kayak gitu atawa kearah itu, belum tentu
kesengajaan nyang bisa diartiin ngajak ke titik titik yang menitikkan titik
noda, sesuai ama penafsiran orang nyang pikirannye ngeres.
Jadi, bisa aje arti konkritnye, nyang punya
rumah jauh dari ganjen. Tapi justru ramah, punya etika dan sangat ngehargain
tamunye, meskipun status sang tamu alias Jali cuman sebates tukang kembang.
Bukantukang ngegelembungin angka di kwitansi nyang tadinye lime ratus ribu
dirubah jadi limaratis jute atawa lima puluh jute
Buktinye, begitu ape nggak, yee,
kalo nyang punya rumah bikin Jali nyang dari tadi cuman bisa ngeliat ke tanah,
jadi kepaksa ngangkat muka dan natap ke pemilik wajah kece?
“ Si abang baru saja kehilangan uang, yaa
?”
“ Sa..saye kagak keilangan ape-ape?”
Lantaran gugup, waktu ngejawab, Jali kayak cowok
gagap nyang otaknye kurang tanggap alias
telmi.
“Tidak kehilangan apa-apa? Kok, sejak tadi si
abang seperti kayak sedang mencari uang yang hilang?”
Jali ngerogoh kantong celana. Nggak ngerasa
keila ngan doku, lantaran dompetnya masih ada. Recehan ti ga ribu perak, sisa
beli bensin, juga masih ada di kan
tong depan
“ Rasanye kagak ada nyang ilang “
Entah sikap atawa jawaban Jali nyang lucu
atawa sikap Jali nyang dianggap lucu. Nyang jelas, cewek kece nyang pake baju
kurang bahan, spontan ngikik. Bikin Jali
jadi bingung.
“ Nyonye ketawa ama siape? “
“ Ketawa sama siapa? Oh, iya, sama setan,
kali. “
“ Ama setan? “
Jali memang jadi kayak orang bego. Maklum,
mula in ketemu nyonya rumah, sampai saat ini, nyang tetep besarang di otaknye
cuman satu, nganter kembang lantas secepetnye pulang
Bersambung………
0 komentar:
Posting Komentar