Cerita Mini
LASKAR BERANI TELER
LASKAR BERANI TELER
Oleh : Oesman Doank
Komeng sengaja nyetop omongannye. Die
kepengen banget ngeliat reaksi temen-temennye, nyang dari tadi kepengen tau,
kenape diundang dateng ke balai serba guna.
“ Waaah, kayaknye asyik punye, tuh.
Terlebih, dari du lu, kite-kite emang udeh pada berani teller. Kayaknye, gue
setuju banget, deh “ Nanang Bopak, nyang kagak mau bengong terus-terusan,
buru-buru ngasih komentar
Aming Beler nyang ngajuin pertanyaan,
kagak mau kalah set. Die nyang baru aje duduk sekelarnye ngajuin pertanyaan,
buru-buru angkat pantat sembari ngacungin jari tangannye.
“ Elu mau kasih komentar setuju ape kagak
setuju?” Komeng langsung ambil inisiatif nanya duluan, lantaran kepengen tau
ape reaksi nyang bakalan keluar dari
mulut Aming Beler, nyang romannye makin beler
“Komentar gue, pasti setuju, friend.
Malah, lu mesti catet nama gue diurutan paling atas. Sebab, gue setuju
sebanget-bangetnye. Kenape?
Lantaran, sekarang aje, gue udeh dalem
keadaan teng go makdirodok. Tenggo tapi masih bisa ngeliat ame ngebedain mane
cecek mane kodok. Kalo dikasih tiga botol lagi, gue jamin, sanggup ngabisin.
Nyang penting, mesti cap topi keserimpet. Kalo cap topi robek, gue kagak doyan.
Sebab, tuh minuman oplosan punya.
Nah, berhubung gue maunye teller tapi ogah
koit lanta ran minuman oplosan, detik ini juga gue bilang: setu juuuuuuu “
Komen Amin Beler nyang semangatnye bukan
aje beapi api tapi juga beasep asep, bikin sohib sohibnye nyang juga dalem
kondisi Gober (TengGO Berat), bereaksi dengan semangat beapi api ples asep.
Komeng narik nafas panjaaaaaaang banget.
Die ngerasa bener bener lega lantaran idenye diapresiasi abis abisan. Malah,
Aming Beler nyang ngerasa dapet angin lantaran gara gara die para sohib pada
ngedukung full tanpa minta amplop, kembali menyuarakan isi beronye.
“ Pokoknye, soal strategi silahkan ente nyang
ngatur. Tapi soal aplikasi, biar gue nyang betindak. Kenapa gue semangat
betindak? Sebab, di sini, nyang berani ngemplang orang nggak salah, cumin gue.
Nyang berani ngutang kagak bayar, gue diurutan nomor satu. Nyang berani bilang
nganggur itu assoi gobret, kan jug ague. Jadi, sekarang gue mau bilang……..”
Bukan cumin Komeng nyang lantas melongo.
Temen temennye juga pada tenganga abis, lantaran Aming bukan ngelanjutin
kalimatnye, tapi langsung ngejoprak ke lantai.
Nyang bikin temen temennye pada
melongo, kondisi AMing nyang baru aje ngegubrak ke ubin, dianggap mengerikan.
Gimane nggak ngeri, kalo due matanye melotot
abis, mulutnye ngeluarin busa dan setelah ngegelinjang sejenak, tuh badan nyang
cukup gede langsung kaku.
“ Eh, Aming… lo jangan belagak koit, dong,”
kate Jambrut nyang ngerasa palanye mangkin berat, tapi lantaran penasaran lantas
megang badan Aming Beler
Tanpa nunggu jawaban Aming nyang memang
kagak bisa ngejawab maning lantaran nyawanye udeh tamat, Jambrut nyang
sebenernye paling kalem, kembali bekoar
“ Aahh payah lo, Ming. Lo kan barusan bilang
kepengen jadi tukang aplikasi. Lantas, gimane lu bisa betindak kalo sekarang
malah koit. Dasar banget deh lo Ming, gue sebel deh sama lo. Mestinye, kalo mau
koit lo bilang dulu, dong. Kalo bilang, kan gue jadi tau kalo elo tuh mau
ninggalin dunie nyang semakin ribet”
Ucapan Jambrut nyang kayaknye becanda
padahal serius banget, bikin Komeng sama anak buahnye nyang laen ngedadak jadi
kelabakan. Setelah ikutan meriksa Aming dan yakin kalo ajal Aming Beler udeh sampe,
Komeng nyang semula paling ceria, spontan gelagapan.
Untungnye, nyang bingung bukan cuman
Komeng doang. Sebab, rekan rekan Komeng juga ikutan berpartisipasi.
Mereka pada ikutan gelagapan, lantaran
ketakutan diangkut ke kantor polisi. Setidaknye, bakal dipanggil lantas
diperiksa sebagai saksi. Sebab, meski Aming tewas bukan lantaran dibunuh, tapi
Polisi pasti mengusut kenape Aming nyang semula sehat walafiat ngedadak jadi
wafat mendadak.
Untung, nggak satu pun dari mereka yang
dimasukin ke sel tahanan. Sebab, kematian Aming emang bukan lantaran
dicelakakan atawa dianiaya. Tapi, akibat minuman keras nyang kelewatan banyak
masuk ke tubuhnye, dan kate dokter sih, begini ame begitu. Ditambah muatan alkohol
dengan porsi berlebihan, akhirnya jadi begono.
Kematian Aming membuat Komeng kembali
berembuk buat ambil keputusan ngebubarin geng Laskar Berani Teler. Temen
temennye nggak ada nyang nolak ide pembubaran. Malah, salah seorang mengusulkan
agar mereka membuat geng baru, yang namanye Laskar Berani Insaf.
“Sebab, kite emang mesti buru buru
insaf. Kalo kagak, nasib kite bisa kaye friend kite, si Aming “ begitu kate die
ngasih alesan.
Alhasil, semua setuju dan bertekad untuk
insaf.
Wassalam
0 komentar:
Posting Komentar