PUCUK DICINTA ULAR PUN TIBA
oleh : Oesman Doblank
ENAM
Markum kagak ragu lagi ngebelokin motornye ke sebuah rumah makan ala sunda.
Maryati nyang tau udeh masuk ke area parkir rumah makan, nggak mau langsung turun dari motor Soalnye, seudeh buka helm Maryati nyenderin wajahnye ke punggung Markum. Bukan lantaran ngantuk berat. Cuma, Maryati sendiri kagak tau kenape bukannye cepet turun malahan nyenderin wajah.
" Lhoo.. kok nggak turun? Nggak malu tuh diliatin tukang parkir," kate Markum nyang kepaksa mesti ngingetin, mesti sebenernye seneng banget punggungnye digelendotin.
Soalnye, sepanjang jalan, Maryati nyang ketauan sama due temen sekampusnye, cuman diem. Alesannye, boleh jadi lantaran die nyimpen mokal. Tapi, Markum menduga lantaran di jalan emang sulit ngobrol. Selaen terganggangu sama suara bising kendaraan, juga lantaran Markum nyang bawa motor mesti konsen sepanjang jalan. Kalo nggak konsen, kagak ati ati, kan bisa aje nabrak atawa ditabrak sama pengendara motor laen nyang kebanyakan egois banget waktu menelusuri jalan raya.
" Memangnye dik Mar nggak suka abang ajak makan di sini?" Markum, lagi lagi besuara lantaran Maryati masih dalam posisi semula
" Suka kok, bang. Cuma kok bawaannye Mar ngantuk banget," kate Maryati, nyang begitu sadar kalo die ngerasa asyik nyandarin muke, spontan ngejawab lantas buru buru turun dari motor.
Markum jadi leluasa turun dari motor dan nyetandarin kendaraan roda duanye.
" Dik Mar mau pesen apa, ya?" Tanya Markum yang sudah mengajak Maryati duduk di sebuah sawung, di mana mereka berhak berada di sana beduaan selama manikmati makanan
" Kayaknye, enakan menikmati makanan nyang abang pesen, deh. Soalnye, Mar lebih siap makan hidangan nyang udeh disiapin,"sahut Maryati
"Oke..kalo begitu kita nikmati gurame asem manis sama sayur asem ples sambel aje, yee. Oh iya, Mar suka makan pete? Abang mah suka banget, lhoo. Jangan diketawain yaa kalo Mar nggak suka nyantap pete?"
" Idiiiih abang... Kok suka sama pete sih? Ikut ikutan yang Mar suka, yaa?"
Jawaban Maryati bikin Markum ternganga. Cuma, sejenak doang. Seudehnye, Markum malah melepas senyum. Duuuh, entu senyum nyang kebetulan dalam tatapan mate bening Maryati, indah bangeeet. Markum nyang ngeliat Maryati menatap sembari lepas senyum juga, ngerasain ada getaran nyang die nggak bisa nyimpulin getaran ape. Soalnye, saat kepengen banget nikmatin getaran di dadanya, sang pelayan besuare
"Boleh saya ambil pak, pesanan menunya?"
Markum spontan menoleh ke sang pelayan. Meski sedikit agak gugup, die buru buru nyerahin bon pesanan yang sudah ditulis dengan huruf yang jelas gampang dibaca.
oooooooo
DI KAMARNYE, Maryati nyang mestinye udeh mejemin mata, malah kelihatan gelisah. Entah sudah berapa kali tubuhnye ngegeliat dan gonta ganti posisi. Entah berape kali Maryati narik nafas panjang. Malah, bekali kali berusaha meremin kedue matenye nyang indah, nyang dirasain Maryati malah susah tidur.
"Kok gue jadi kagak bisa bobo, yee?"
Maryati nyang baru aje ngebatin, lantas bangun dari tempat tidur.
Seudeh duduk di tepi ranjang. Maryati ngeremes remes rambutnye nyang panjang. Kayaknye, kalo ada nyang tau lantas nanye kenape kagak bisa bobo, Maryati pasti ngejawab asal jeblak. Artinye, kagak bakalan ngomong jujur kalo sebenernye die lagi mikiran bang Markum.
Yaa... mikirin bang Markum nyang udeh ngajak makan malem di rumah makan khas Sunda dan mereka duduk beduaan di sebuah sawung sambil nikmati hidangan lezat. Namun, nyang terasa lebih lezat bukan suasana di sawung nyang anginnye sepoi sepoi. Tapi juga sentuhan tangan bang Markum nyang lantas ngelus ngelus jari jemarinye.
. Lantas... Maryati mendadak jadi bingung, lantaran sama sekali nggak diduga kalo dalem suasana nyang serasa indah itu, Markum mengungkapkan isi hatinya.
Kenape saat nikmati suasana nyang begitu lezat Maryati malah sempet bingung? Soalnye, sama sekali nggak nyangka kalo detik entu juga, Bang Markum ngungkapin isi atinye. Busyet, deh, nekad banget die bilang jatuh cinte sama Maryati.
Untungnye, bang Markum kagak ngedesek supaye Maryati ngejawab. Boleh jadi die tau, kalo Maryati belon siap ngasih jawaban. Kalo aje ngedesek, Maryati pasti udeh kelabakan. Bukan lantaran kagak merasa ketarik. Cuman, Maryati belon tau persis, apakah siap menerima cinta Markum dan maduin cintanye.
" Kapan yee gue bisa kasih kepastian," tanye Maryati, nyang seudehnye kelihatan gelisah lantaran atinye terus ngegeliatin rasa nyang entah ehem ehem atawa ohom ohom.
Sebab, emang cuman die nyang tau ape nyang mesti die putusin buat ngejawab ungkapan hati Markum nyang udeh diperosotin dengan blak blakan.
"Duuuh... bang Markum udeh bobo ape belon, yee?" gumam Maryati nyang lantas ambil seluler tapi akhirnye ngetabalin niatnye ngebel ke bang Markum.
Bersambung........
0 komentar:
Posting Komentar