CINTAKU JANGAN DIBELAH DUA
(1)
CICILAN motor JALI cmang cuma tinggal tiga bulan maning. Selebihnye, die udeh bayar dan
tiap bulannye bayar tepat waktu. Tapi, masih sise tige bulan atawa masih setaon
lagi, kalo kagak bayar tiga bulan beturur turut, tentu aje nasibnye bakalan
tete sama, bakal dicomot paksa sama debt collector. Sebab, nyang susah
ngelunasin kreditan motor, mesti rela ngadepin tindakan debt collector, nyang siap
nyita motor di tengah jalan yang lagi dipake sama pemiliknye.
Kalo udeh begitu, mendingan pasrah.
Sebab, kalo nyoba ngelawan atawa mempertahankan motor supaya jangan diangkut,
nyang namanye debt collector malah jadi
galak.
Tapi, bukan soal diambil ape kagak
diambil ame debt colektor nyang bikin Jali kepakse minggirin motornye. Intinye,
die minggirin motor ame sekalian berenti lantaran hape di kantong celananye,
terus menerus bebunyi. Meski bisa aje die komunikasi sambil terus ngejalanin motornye,
tapi Jali lebih milih minggir ples berenti, lantaran Jali kagak mau dibilang
orang norak.
Jali sadar, ada aturan kagak boleh ngobrol
lewat hape sembari ngendarain motor. Jadi, tuh aturan mesti ditaatin. Lagian,
kalo kagak ditaatin, pas akhirnye malah bahayain diri sendiri, nyang repot
bukannye orang laen. Tapi diri sendiri
Jali buru-buru ngerogoh kantong celana buat
ngeluarin hape nyang ring tonenye enak
didenger Maklum, nyang kedengeran lagu bejudul Kompor Meledug, lagunye almarhum Benyamin Suaeb, nyang paling die demen..
Sambil ngedengerin lagu dari bang Benyamin
Suaeb, Jali melototin mata ke layar hp.
Die ngecek, ngebaca, siapa nyang tengari bengkak ngehubungin die nyang lagi
ribet di jalan padet. Siape nyang ngeganggu perjalanan dinesnye, nganterin
anthurium jaipong, nyang harganye pernah
selangit tapi sekarang udeh jatoh ke
kolong langit
Nggak cuman anthorium jaipong atawa anthorium
cobra aje nyang harganye terus melorot. Kembang jenis laen juga sama, jatoh ke
anak tangga paling bawah. Bener-bener jadi kagak beda sama dunia sepakbola Indonesia .
Nyang dari zaman kuda gigit martabak sampe zaman kuda teller, kagak pernah bisa
ikutan bertanding di kejuaraan dunie. Sebab, baru ikut di babak penyisihan udeh
langsung teklok. Tapi, Jali yakin, seminggu jelang kiamat, pasti tim nasional
berhasil ngerebut piala dunie
Begitu ngebaca tulisan Enyak Gue di
layar hpnye, Jali ngegerutu. .
“ Aduuuuuh….enyak nih, ade ape lagi,
sih? pan ta di gue udeh bilang. Udeh ngejelasin, abis magrib baru bisa nemuin. Eeeeh,
belon setengah jem, udeh nelpon lagi. ”
Jali nyang kepengen cepet-cepet
ngelarin tugas utamanye, nganterin anthorium pesanan pak David, emang kagak
matiin hpnye. Cuman, tuh hp nyang ce pet cepet dimasukin lagi ke kantong
celane, rewel banget. Mentang-mentang
kagak di off in, nada pang gilnye bunyi terus. Makin lama malah makin
nyaring, kayak suara penyanyi dangdut nyang makin oke lanta ran terus menerus
diguyur saweran
“ Bodo amat, dah. Paling enyak marah.”
Jali nyang kagak peduliin lagi hapenye
terus-terus an bunyi, cepet-cepet make lagi helm SNInye. Begitu kerasa nyaman,
die mulain lagi ngegas motornye. Ten tu
aje Jali kepengen banget cepet cepet sampe ke alamat nyang bakalan dituju
secepetnye. Cuman, lantaran udeh biasa bawa lari motor maksimalnye empat puluh
kilo meter, Jali ngerasa malu sama diri sendiri,. kalo die naekin gas ke angka
delapan puluh.
Bersambung.....
0 komentar:
Posting Komentar