KEPENGEN KAWIN
oleh : Oesman Doank
oleh : Oesman Doank
Akhirnye, Mat Bodong sampe juga ke tahap jenuh ngelajang. Bukan lantaran die iri sama sohibnye nyang udeh pada ngebangun rumah tapi kagak pake tangga. Mat Bodong bener bener iri sama temennye nyang udeh serius berumah tangge. Cuma, kate Mat Bodong, rasa irinye jauh dari kesan negatif.
"Iri gue tuh positif," teges Mat Bodong nyang rada kesel juga sama Sani Buluk, lantaran die nyang juga masih ngelajang, protes lantaran nganggap Mat Bodong ingkar janji.
"Soal irilu positif atawa negatif, kagak gue pikirin,Mat. Cuma, kan lu udeh janji, kita bakal sama sama ngelajang terus kalo kawin juga bakal bareng bareng. Kenape lantas lumalah ngeduluin. Bukannye kita juga janji nggak saling ngeduluin?" Sani Buluk tetap kagak setuju sama alesan sohibnya.
"Gue tau, San... Gue tau kalo kite pernah berikrar. Cuman, ape salahnye kalo soal nyang satu ini gue ingkar. Maaf San...gue bukan mau niru niru pejabat nyang sering nyontohin ingkar janji. Cuman, kalo emang jodoh udeh dateng, gue bisa ape?" Jelas Mat Bodong
"Pokoknye, gue kagak terima alasan, titik !" Sergah Sani Buluk sambil ngebanting puntung rokoknye nyang lantas cau, pergi dengan nyetel muke secembetut betutnye.
Mat Bodong kepengen banget nahan kepergian Sani. Cuma, die nyang sadar temennye lagi esomi alias emosi, milih ngebiarinin temennye hengkang.
*******
" Mamat... Mamat... elu kan nyang minta ke enyak sama babe lu supaya ngelamarin si Dewi Kutilan Dipipi?" Tanya mpok Rodiyah Jeblok, nyang keliatan pusing lantaran makin dekat waktu ngelamar Mat Bodong belon nyiapin ape nyang mau dibawa.
" Kalo bener, kenape sampe sekarang elu belon ngasih doku ke enyak buat belanje?" Tandas sang enyak.
Mat Bodong emang sempet kaget. Tapi, waktu die denger enyaknye ngomong soal doku buat belanje, sambil senyum Mat Bodong ngejawab.
"Nyak.... Ngelamar tuh, kan, pake omongan. Bukan pake belanjaan. Jadi, pas waktunye kite dateng aje kaya' orang siliturahim. Nah, kalo lamaran diterima, baru kita siap siapin ape nyang nantinye pas nikah dibawa"
" Eh, Mat... Silaturahim sama ngelamar tuh, beda. Lantaran beda, kite mesti bebawaan. Kalo kagak bebawaan, namanye cuma silaturaim, bukan ngelamar. Ngerti lo?"
"Enyak kok begitu sewot, sih. Pan nyang mau kawin, nyang mau berumeh tangge, saye. Bukan enyak bukan babe"
"Kok gue jadi pusing sih tiap kali diskusi sama lo. Emangnye lo nggak jadi ngelamar?" Kata Mpok Rodiyah Jeblok, nyang tentu aje jadi makin sewot.
Ngeliat enyaknye sewot , Mat Bodong buru buru minta doku, eh, maaf
maksudnye minta maaf. Setelah enyaknye kagak emosi, Mat Bodong ngejelasin kalo die emang mau ngelamar dengan tangan kosong. Jadi, cuma bawa niat tulus dan keseriusan
"Ape lu bilang ?" Mpok Rodiyah Jeblok kemlai nyentak. Maklum rasa kagetnye lebih dari orang kesamber gledek
Tapi, bukan Mat Bodong kalo nggak bisa ngebujuk nyokapnye. Setelah ngejanjiin mau diajak piknik ke Ciater nyang hawanye dingin dingin empuk, eh, dingin dingin sejuk, Mpok Rodiyah baru narik nafas lega.
Malah, die ngedukung rencane anaknye, nyang mau kawin secara sederhane. Gak pakai hajat gede gedean. Tapi cukup akad nikah sama doa bareng sama sanak sodare ples tetangge.
Soalnye, kate Mat Bodong nyang kerja di PT Hembusan Angin Kencang, die bukan kagak atawa belon punya duit. Tapi, duitnye nyang udeh cape cape dikumpulin, mau dipake sesuai kebutuhan.
Jadi, timbang abis buat pesta pora, kan lebih baik dialihin buat beli rumah sama perabotannye. Buat ngahajiin enyak babe ples kedua mertuanye. Nah, sisanye mau dipake buat ngebiayain keperluan sekolah beberapa anak yatim nyang layak dan sangat patut dibantu, lantaran sekolahnye pada bener. Begitu juga ibadahnye
" Ape lu kate? Si Mat Bodong mau ngehajiin kite sama besan kite?" Tanya Bang Bike, nyang tentu aje kaget ngedenger penjelasan bokinnye.
Saking kagetnye, malam Jumat nyang biasenye kudu setor, bang Bike jadi lupa setor. Soalnye, kate bokinnye, meski punya doku anaknye lebih suka manfaatin duit buat hal hal nyang berguna, banyak manfaat, tidak malah mubazir dan ngelahirin kemauan dan semangat bersedekah.
" Gue kagak sangka kalo pikiran anak gue udeh moderen," kate Bang Bike, nyang mestinye setor tapi malah langsung ke kamar mandi, lantas die bersujud. Bersyukur sama Sang Khalik, lantaran anaknye udeh bepikiran cerdas
0 komentar:
Posting Komentar