PUCUK DICINTA ULAR PUN TIBA
oleh : Oesman DoankGimane nyokapnye Maryati kagak bingung. Biasanye, jangan kate punye inisiatif ngebantu di dapur, tiap diminta ngebantuin enyaknye ngerebus aer buat anak anak kost nyang sekalian ngekos ples makan, Maryati jarang banget bersedia. Alasanye, kalo nggak mesti belajar yaa mesti buru buru berangkat ke kampus.
Cuman, sebingung ape juga, sang nyokap kagak komentar tumben lo mau ke dapur. Malah, sang nyokap bilang, "Alhamdulillah... akhirnye mau juga lo kenalan sama dapur"
"Ape salahnye sih sesekali nengokin dapur di rumah sendiri," sahut Maryati sembari ngambil panci, lantas ngisi tuh panci sama air buat dimasak.
"Emangnye lu mau mandi sama air panas?" Tanya sang nyokap
"Nyak... kemaren sore tuh, Yati nyuwek bebekin bang Markum. Gara garanye, yaa apekagi kalo bukan lantaran kentang goreng," tanpa ragu Maryati jelasin maksudnye ngejarang aer
"Gue kagak ngerti maksud lu?" Sang Nyokap malah bingung.
"Begini lho nyak," kata Maryati, nyang lantas ngejelasin secara ganblang kenape pagi pagi die udeh ke dapur buat masak aer.
"Yati tuh kepengen minta maaf sama bang Markum. Cuman, kalo langsung nemuin die buat minta maaf, kayaknye nggak seru, deh. Jadi, Yati kepengen nganterin teh panas ke kamarnye, lantas mau ngeliat rekasi bang Markum. Kalo die keliatan nggak senang, yaa... Yati taroh aje di mejanye. Tapi, kalo sebaliknye, baru deh Yati manfaatin buat sekalian minta maaf"
"Kalo die mau maafin, lu. Kalo malah sebel lantas die ngebales nyuekin, gimane? " tanya san nyokap
"Yaa... kalo die bales nyuekin, gak bakalan Yati pikirin. Nyang penting, kan Yati udeh ngakuin kesalahan dan mau minta maaf. Jadi, beban rasa bersalah nyang Yati pikul, langsung udeh lepas," kate Maryati
Sang nyokap bukan kagak seneng ngeliat ples tau ape nyang mau dikerjain sama Maryati. Cuman, nggak berani bilang jangan jangan lo naksir. Sebab, ngeri juga kalo anaknye malah ngejawab mendingan naksir dan mikirin kentang goreng
Kan repot kalo anaknye malah nuntut dibikinin goreng kentang. Bukan nggak sayang sama anak. Tapi, kebetulan stok kentang udeh bures, dan dirinye males belanja ke pasar, nyang kondisinye kayak kubangan di tiap musim hujan
Sang nyokop cuma ngedoain, semoga anaknye kecantol sama Markum nyang udeh punya masa depan. Kayaknye, kalo anaknye nikah sama cowok nyang udeh punye kerjaan, nggak bakalan telantar. Terlebih, keliatannye Markum punya jabatan.
Maryati nyang kagak tau ape nyang disimpen enyaknye di dalem ati, setelah ngetuk pintu kamar Markum dan ngucap salam, ngedadak ngerasa deg degan. Die heran kenape bisa jadi deg degan. Padahal, waktu abis ngaduk gula buat manisin teh nyang dibikinnye, hatinye begitu tenang.
" Bang Markum marah ape kagak, yee?" Maryati yang masih deg degan ngebatin sembari berusaha untuk nenangin degup jantungnye nyang rusuh kayak para demonstran nyang kalo ngegelar demo suka ngelakuin perbaatan anarkis.
Markum nyang dari dalam ngejawab salam, setelah ngebukain pintu bukannye kagak kaget. Sebab, sama sekali nggak nyangka kalau pagi ini, nyang nganterin teh bukan ibu kost, tapi anaknye, nyang semalem wajahnye selalu nongol di pelupuk mata Markum.
Meski begitu, Markum gak kepingin pamerin rasa kagetnye. Die buru butu bersuara
"Lhoo... emangnye ibu neng Yati kemane?" Kata Markum
Melihat dan ngedengar sapaan Markum, kayaknye, Maryati kepengen teriak, bilang maaaaak. Tuluuuuuuuung, kok di depan Yati ada cowok ganteng nyang sopan banget.
Untung Maryati buru buru ngeredam hasrat teriak minta tulung. Meski gugup, Maryati segera menyahut
"Enyak ada di dapur. Cuma, enyak barusan minta tulung sama Yati buat anterin teh panas buat abang.... Boleh Yati masuk ke kamar buat naruh teh di meja yang ada di dalem?"
Kayaknye, bego bin bloon deh kalo nolak permintaan cewek cakep bebodi bahenol nyang kepengen masuk buat naruh air teh di mejanye. Cuman, Markum memang lebih kepengen membloonkan diri.
"Maaf.. bukan saya melarang... tapi nggak usah repot repot. Biarlah saya saja yang langsung menerima teh dari Yati. Soalnye, saya kepengen cepet cepet mandi karena harus segera ke kantor," kata Markum sambil mengangkat dan nyodorin tangan buat nerima gelas berisi teh panas dari Maryati yang membawanya dengan baki.
Apakah Maryati manfaatin sikon buat negelaksanain niatnya nyang kepengen minta maaf?
Bersambung............
0 komentar:
Posting Komentar