LASKAR BERANI TELER
Oleh : Oesman Doank
Ujung ujungnye, Komeng bukan cuman kesel sama nasibnye. Tapi juge sungguh
sangat kuciwa sama kenyataan nyang bikin
dirinye kagak mampu ngerobah nasib. Statusnye
nyang pengagguran tulen, bener-bener kagak berobah selaen di sekitar dunia ngukur
jalan tapi nggak bawa meteran.
“Tapi gue kagak boleh putus asa,” kate
Komeng ke dirinye sendiri. Bekali-kali Komeng ngebatin supaye dirinye tetep
kuat. Emang kagak percuma. Buktinye, Komeng punya solusi nyang bisa dibilang
super hebat.
Begitu dapet ide hebat, Komeng buru-buru call rekan-rekannye. Peyang, Udin Kelebot, Aming Beler, Didin Gabruk, dan temen-temen
laen nyang sama-sama lagi bingung ngadepin hidup di dunie lantaran kagak pernah
bisa cuti dari pengangguran, nyambut dengan semangat berapi-api. Malah semangatnya ada yang sampe berasep asep. Katanye, sih, supaya afdol dibilang punya semangat. Bukankah kalo ada api mesti ada asep?
Malah, begitu hari H dan pada punye waktu
buat ngumpul di balai serba guna kampung
Bojong Kesungsang, Dul Petot
nyang pernah ngimpi jadi politikus ulung sedunie, langsung ngajuin usul supaye
ngebentuk orpol.
“ Pale lu bau ingus koruptor,” tanggap Peyang,
nyang sama sekali kagak setuju, lantaran menurut die, kandidat parpol nyang
saat eni udeh duduk di gedung DPR, gebrakannye kagak ada nyang bikin
pengangguran lenyap dari Indonesia.
“ Mangkenye, kite sendiri nyang mesti langsung
berpo litik,” tangkis Dul Petot dengan tetep berapi-api.
Lantas, tanpa ragu atawa malu, Dul Petot nyang
man faatin waktu luang lantaran Komeng nyang punya hajat masih nangkring di
toilet balai serba guna, minta supaye temen-temennye setuju dan ngedukung ide
die nyang mau bikin Partai SKDR (Seneng Korup Duit Rakyat)
“Lu mau bikin partai ape mau digebukin
masyarakat, sih !” tanggap Aming Beler, nyang diem-diem – maling-maling
kesempetan- sambil ngumpet, nyedotin
minuman merk Topi Keserimpet nyang di masukin ke bungkusan plastik.
“ Mane mungkin rakyat ngegebukin kite,” sahut
Dul Petot.
“Buktinye, “ kate Dul Petot ngelanjutin
jawabannye. “ Sampe saat ini, para koruptor mangkin banyak. Nyang ketangkep
KPK, nggak ada tuh nyang digebukin sama masyarakat. Malah, mereka seneng.
Sebab, di penjara kondisinye kayak di hotel bintang lima . Jadi, kan bener-bener asoi geboi jadi koruptor
timbang jadi maling jemuran nyang begitu ketangkep langsung digebukin sampe
babak belur “
Kalo Komeng kagak nongol ngedadak, boleh
jadi, diskusi nyang mulai panas, bisa
jadi mangkin hot. Tapi, lantaran Komeng nongol, dan langsung ngomong kayak
gini,
“Gue ngundang bukan mau bikin
parpol. Tapi, mau bikin kelompok geng”
Diskusi nyang dibangun Dul Petot, tentu aje
langsung mampet. Dul Petot sendiri, buru-buru mingkem. Maklum, diantara sekian
banyak temannye, Dul Petot cuman takut sama Komeng. Mangkanye, Dul Petot
langsung mojok. Die janji dalem atinye, kagak mau ngomong macem-macem.
“ Siape tuh tadi nyang gue denger mau bikin
parpol ?” Tanye Komeng, nyang sengaje nyari tau, orang nyang diangapnye punye
ide gelo, lantaran Komeng nyadar, bangun parpol buat ladang nyari duit,
dibangunnye juga mesti pake banyak duit. Bukan cuman pake semangat ame
idealisme doang.
Bersambung
0 komentar:
Posting Komentar