Laskar Berani Teler
Oleh : Oesman Doank
Di
kampung Bojong Kesungsang, siape nyang kagak kenal Komeng? Cowok nyang punye
bodi lebih dari atlit, nyang tampangnye bise dibilang ganteng dan sebagai Ketua
Laskar Berani Teler, jelas dikenal lantaran termasuk pentolan anak mude nyang
paling disegenin di kampung Bojong Kesungsang.
Cuman, nasibnye bise dibilang spm[lak
abis. Soalnye, selepas droup out dari SMU Wajib Cerdas,
selaen jadi pengangguran abadi, juga kagak pernah punye demenan.
Padahal, Komeng kagak pernah
memproklamirkan diri sebagai cowok nyang anti cewek. Nyatanye, waktu nguber
Susi, malah malah mau dikemplang same babenye. Maklum, Susi nyang bodinye cukup montok, mau dijodohin
sama bandar ikan asin.
Gitu juge waktu mau ngegaet Nunung –
anak semate wayang bang Gobang. Meski udeh dapet sinyal, eeeh, Nunung akhirnye
lebih kepincut sama Diding Gulagali, lantaran Diding lebih punya masa depan dan
Diding bukan cuman udeh punye motor kreditan doang. Tapi, juge udeh jadi karyawan
sebuag bank swasta.
Die emang cuman karyawan dan bukan
pejabat bank. Meski ngaku terus terang statusnye cuman satpam, buat bang
Gobang, Diding udeh jelas punya masa depan. Kalo Komeng, bukan nggak punya
masa. Cuma, masanye bukan masa depan. Tapi, masa iye sih pengangguran pake
didemenin.
Jadi, jangan kate ngejamin masa depan
perempuan nyang bakal dijadiin bini, buat diri sendiri aje, susahnye pasti
susah nyang pake banget alias susah banget Itu sebabnye, Nunung lebih milih
Diding Gulagali, nyang dari soal ganteng, emang kurang. Tapi, soal rezeki, jauh
lebih oke, timbang milih Komeng
Lantaran sadar kalo nganggur susah dapet
cewek, Komeng, mau kagak mau banting stir. Artinye, kalo semule die bepikiran kerjaan nyang datengin die, lantas sudut pandangnye berobah. Begitu juga,
sikapnya. Kalo mulanye pasif, terus
berobah jadi aktif. Dari nyang semule ngarepin kerjaan nyang dateng, lantas
mulain nguber-nguber kerjaan. Padahal, kerjaan nggak salah ape ape, kok kenape
mesti diudak udak
Tentu aje nyokap ame enyaknye gak sebates girang.
Tapi, ngedukung abis. Bang Toyib ame mpok Noni, rela ngejual kambing satu-satunye
buat biaya Komeng ngelamar ke sane kemari. Cuman, nyari kerjaan kagak segampang
nyari orang geblek. Kalo orang geblek bisa ditemuin dimane-mane dan kapan aje
siap diajak ngelakuin perbuatan geblek, nyari kerjaan susahnye setengah mati
setengah pingsan.
“Masa’ sih gue kudu jadi tukang ojek,”
simpul Komeng, nyang akhirnye putus juge kolor semangatnye, lantaran
serajin-rajinnye nyari kerjaan, kalo kagak punye ijazah, nyang die alamin cuman
dijanjiin bakal dihubungin kalo dunia udeh dinyatakan krisis energi.
0 komentar:
Posting Komentar