PUCUK DICINTA ULARPUN TIBA
oleh : Oesman Doank
BAGIAN LIMA
MARKUM yakin banget kalau yang baru disampaikan mengandung magnit, membuat Maryati senang Meski rasa senang disembunyikan sebisa Maryati, tapi Markum paham apa yang mesti dia lakukan setelah di pagi hari ada pucuk dicinta ulam tiba.
Dengan suara agak tertahan, Markum mengatakan kepingin sekali mengajak Maryati makan malam di luar. Jika hari ini Maryati kuliah sore, kata Markum, dia akan siap menjempunya di kampus. Maryati tinggal memberitahu jam berapa dia mulai meninggalkan ruang kuliah
"Ta... tapi," Maryati nyang lantaran senang jadi malah kelihatan gugup
"Jika keberatan, sama sekali tak jadi masalah. Tapi bila bersedia, sms abang, yaa?" kata Markum yang setelah memberi umpan segera pamit karena dia akan segera berangkat ke kantor.
"Iyaa.. nanti saya kabarin," Maryati segera menyahut karena Markum sudah mendorong pintu kamar ke dalam.
Sang nyokap memandang anaknye dengan tatapan menyelidik. Gak laen lantaran die heran, kok nganter teh ke kamar kost aje kayak beli bawang di Brebes. Lama banget
" Yati.. Yati... lu tuh nganter teh ape beli bawang nyang harganye lebih mahal ke Brebes, sih?" Kata Sang nyokap nyang mulanye cuma mau natap - sebatas nyelidik, tapi akhirnye nggak bisa bisa mingkemin bibir
Ngedenger omongan enyaknye, Maryati nyang sebenernya lagi girang -- jeileee hatinye berbunga bunga, bukan kagak kaget. Soalnye, die pikir nyokapnya cuwek onta. Kagak taunye... eh malah lagi fokus perhatiin dirinye. Timbang ngejawab tapi salah lantas ujung ujungnye ketauan kalo tadi ngobrol cukup lama, Maryati pura pura kagak ngedenger.
Tau anaknye nyuekin dengan belagak kagak ngedenger omongannye, sang nyokap jadi kagak betah.
"Eh Yati... lu punya kuping masih ada ape udeh digadein buat bayar utang negare, sih"
Kali ini, Maryati kepaksa nahan langkah. Bukan lantaran kalimat enyaknye. Tapi, lantaran Maryati nangkep aura enyaknye nyang kesel lantaran dicuekin.
"Enyak... enyaaak... Ade ape, sih, kok jadi mendadak sewot sama anak. "
" Ade ape ? Gue tuh nanya sama lo, eh, orangtue nanye malah dicuekin"
" Nyak... Yati tuh bukan nyuekin enyak. Tapi lagi mikir, hari ini ke kampus ape nggak perlu ninggalin rumah. Jadi, maafin Yati yee kalo enyak nyangka Yati nyuekin enyak," kata Maryati sembari memeluk sang nyokap.
Kalo nyokapnye malah ngambek dan kagak maafin anaknye nyang botoh, udeh pasti tuh orangtua baru aje nenggak obat nyamuk cair. Apakah nyokapnye Maryati baru aje nenggak obat nyamuk cair. Waah jangan bikin gosip, dong. Sebelon Maryati muncul, doski memang nenggak cairang dari gelas. Tapi bukan obat nyamuk cair. Yang ditengggak sekali bures, minuman yang menyehatkan. Maklum, tiap pagi beliau selalu rutin minum susu.
"Iyee.. iyee... gue maafin. Cuma, boleh dong enyak tau kenape lu nganter teh bisa ngabisin waktu cukup lama," kate sang nyokap, nyang akhirnye manfaatin kesempetan buat nyelidik lebih dalem
"Bang Markum, kan ngajak ngobrol nyak," mau nggak mau Maryati males ngebohong
"Ngajak ngooooobrol. Kok mau sih lo diajak ngobrol. Kan lu bilang enakan kentang goreng," sang nyokap nyang ngeliat dan tau kalo anaknye keliatan senang, malah mengganggu.
"Idiiiiiiih enyak.... ada ada aje, deh" Maryati jadi tersipu .
"Ada ada aje emang tuh si Markum. Pagi pagi, dianterin teh manis, bukan bersyukur malah nahan anak gadis buat diajak ngobrol. Ape die kagak tau, kalau enyaknye nunggu di dapur sampe kakinye kesemutan," sang nyokap nyang kepingin tahu banyak, mulai ngeganggu Maryati dengan caranya.
Membuat Maryati tersipu. Malu tapi senang. Senang tapi malu. . .
Tapi, untung aje nggak malu maluin. Soalnya, pas di kampus, die ketauan sama Ratih dan Dina. Brengseknye, pas die nyamperin ke Markum nyang masih di motor, kedua rekannya ngelihat ulah Maryati. Padahal, tadi mereka ngajak Maryati pulang bareng. Eeeh, ditolak lantaran Maryati bilang mau mampir ke rumah encangnye. Buktinye, disamper cowok bersepeda motor.
"Eh Yati... mau ke rumah encang ape disamper encing?" Kate Ratih
" Yati Yati.... mau indehoi aje pake cipoain kite, deh. "
Maryati bukan nggak mokal. tapi, die belagak cuwek dan bilang ke Markum supaya segera start. Meski begitu, Maryati menyempatkan diri buat pamitan ke Ratih dan Dina.
"Gue jalan duluan, yee"
" Oke deh... selamet hepi hepi" sahut mereka sembari senyam senyum lantaran berhasil ngeliat Maryati bersama seorang cowok, tapi dalam keadaan tertangkap kering.
Mau dibawa kemane yee, Maryati nyang udeh nyemplak di motor Markum ?
Bersambung.........
0 komentar:
Posting Komentar